1Cor 3 | NdeIBE | STEP | Bazalwane, ngangingeke ngikhulume lani njengabomoya kodwa njengabomhlaba

1 Corinthians 3

Mayelana Lokudabukana OkuseBandleni

1 Bazalwane, ngangingeke ngikhulume lani njengabomoya kodwa njengabomhlaba – izingane nje kuKhristu. 2 Ngalinika uchago, hatshi ukudla okuqinileyo, ngoba lalingakakulungeli. Impela lilokhu lingakakulungeli. 3 Lilokhu lingabomhlaba. Ngoba njengoba kulomona lokuxabana phakathi kwenu, kambe kalisibo abomhlaba na? Kalenzi njengabantu nje na? 4 Ngoba nxa omunye esithi, “Mina ngilandela uPhawuli,” omunye laye athi, “Mina ngilandela u-Apholo,” kambe kalisibantu nje na?

5 Kanti u-Apholo uvele eyini na? Lo-Phawuli uyini na? Bayizisebenzi nje kuphela lina elakholwa ngazo – njengoba iNkosi imisele omunye lomunye umsebenzi wakhe. 6 Mina ngahlanyela inhlanyelo, u-Apholo wayithelela, kodwa nguNkulunkulu owayikhulisayo.

7 Ngakho lowo ohlanyelayo, loba othelelayo, akasilutho, kodwa nguNkulunkulu kuphela owenza izinto zikhule. 8 Umuntu ohlanyelayo lomuntu othelelayo banhlosonye, njalo lowo lalowo uzavuzwa mayelana lokusebenza kwakhe. 9 Ngoba thina siyizisebenzi kanye loNkulunkulu; lina liyinsimu kaNkulunkulu, isakhiwo sikaNkulunkulu.

10 Ngomusa uNkulunkulu angipha wona, ngabeka isisekelo njengengcitshi yomakhi, njalo abanye bakha phezu kwaso. Kodwa omunye lomunye kumele ananzelele ukuthi wakha njani. 11 Ngoba kakho ongabeka esinye isisekelo ngaphandle kwaleso esivele sesibekiwe, esinguJesu Khristu. 12 Uma umuntu esakhela phezu kwalesisisekelo ngegolide, ngesiliva, ngamatshe adulayo, ngezigodo, ngotshani loba ngamahlanga, 13 umsebenzi wakhe uzabonakaliswa unjalo, ngoba uSuku luzawubeka ekukhanyeni. Uzavezwa obala ngomlilo, njalo umlilo uzahlola umsebenzi womuntu ngamunye ukuthi unjani.

14 Uma lokho okwakhileyo kusala kukhona, uzakwamukela umvuzo wakhe. 15 Kodwa uma kusitsha kuphele du, uzalahlekelwa; yena ngokwakhe uzaphepha, kodwa kube njengomuntu ophunyuka edabula phakathi kwamalangabi.

16 Kanti kalazi yini ukuthi lina ngokwenu lilithempeli likaNkulunkulu kanye lokuthi uMoya kaNkulunkulu uhlala phakathi kwenu?

17 Uma umuntu echitha ithempeli likaNkulunkulu, uNkulunkulu uzamchitha; ngoba ithempeli likaNkulunkulu lingcwele, njalo lina liyilelothempeli.

18 Lingazikhohlisi. Uma omunye wenu ecabanga ukuthi uhlakaniphile ngokwesilinganiso salesisikhathi kabe yisithutha ukuze ahlakaniphe. 19 Ngoba ukuhlakanipha kwalo umhlaba kuyibuthutha phambi kukaNkulunkulu. Njengoba kulotshiwe ukuthi: “Ubamba abahlakaniphileyo ebuqilini babo,”

20 lokuthi, “INkosi iyakwazi ukuthi imicabango yabahlakaniphileyo iyize.”

21 Ngakho, akungabi khona ukuzincoma ngabantu. Izinto zonke ngezenu, 22 loba nguPhawuli kumbe u-Apholo loba uKhefasi kumbe umhlaba loba ukuphila kumbe ukufa loba kukhathesi kumbe kwelizayo – konke ngokwenu, 23 njalo lina lingabakaKhristu, loKhristu ngokaNkulunkulu.